خواطري و شعري و الهامي بقلم الشاعر المصري منير خاطر

نسيت آلامى لما شوفتك

واحلى ايامى يوم عرفتك

ودعت من ساعتها احزانى

ولا عاد ف عينى الا صورتك
...
اقوم م النوم انادى اسمك

واتخيل ملامحك ورسمك

جمالك مالى قلبى وعيونى

وبتمنى ساعة لما اقابلك
....
صوتك بيرن فى ودانى

بيحرك احساسى وكيانى

بيخلينى انسى نفسى

واعيش زمان غير زمانى
....
معرفش ليه كدا حبيتك

ومن بين الكل هويتك

فجاه لقيتك جوه قلبى

نيمتك فيه وغطيتك
....
وبتمنى تخليك معايه

نكتب مع بعض حكايه

يحكيها اجيال واجيال

عن حب صافى ومالو غايه
....
حب للحب وبس

وعواطف فى القلوب تتحس

واغير عليك من نسمه طايره

لو حتى على شعرك تمس
....
يا ترى اللى فيك زى اللى فيه

وحاسس باللى بتقوله عنيه

ولا يكون بيتهيالى حبك

وانته منتش دارى بيه
....
حتى لو كان كدا راضى

منا حبى ليك مهوش عادى

لا حد شافه ولا عرفه

ولا مصالح وكلام فاضى

منير خاطر